दुई दिनमा झन्डै डेढ लाखले छोडे उपत्यका

स्थानीय तह निर्वाचनमा मतदान गर्न दुई दिनमा करिब १ लाख ५० हजार मानिसले काठमाडौं उपत्यका छोडेका छन् । महानगरीय ट्राफिक प्रहरी महाशाखाका अनुसार मंगलबार बिहानदेखि आज (बुधबार) बिहानसम्म १ लाख ४१ हजार जनाले काठमाडौं छोडेका छन् । महाशाखाको तथ्यांक अनुसार अरु दिनमा सरदर ५९ हजार जना उपत्यका आवतजावत गर्थे । अहिले उपत्यकाबाट बाहिरिनेको संख्या ह्वात्तै बढ्दा भित्रिनेको संख्या घटेको छ । मंगलबार बिहान ६ बजेदेखि आज बिहान ६ बजेसम्म ९ हजार ९५६ सवारी साधन बाहिरिएका छन् । सोही समयावधिमा मंगलबार ५९ हजार ८१ र बुधबार बिहान ६ बजेसम्म ८२ हजार जनाले उपत्यका छोडेका छन् ।आज र भोलि गाउँ जानेको संख्या बढ्ने महाशाखाको अनुमान छ ।