लुम्बिनीको राजधानी दाङबाट रुपन्देहीमै फिर्ता ल्याउँछौं : गृहमन्त्री खाँण

३० कात्तिक, बुटवल । गृहमन्त्री बालकृष्ण खाँणले लुम्बिनी प्रदेशको स्थायी राजधानी रुपन्देहीमै फिर्ता ल्याइने बताएका छन् ।

बुधबार सत्तारुढ गठबन्धनले गरेको पत्रकार सम्मेलनमा उनले कुनै पूर्वाधार नै नभएको ठाउँ दाङको भालुवाङमा प्रदेश राजधानी रहन नसक्ने जिकिर गरे ।

‘रुपन्देहीका जनतालाई थाहा नदिई कसैले राजधानी सार्छ भने बाटैबाट त्यो राजधानी सारेर फिर्ता ल्याइने छ’ खाँणले भने ।

दाङको भालुबाङमा राजधानी लैजाँदा सरकारको खर्बौं रकम खर्च हुने भएकाले उक्त निर्णय सच्याउनुपर्ने मन्त्री खाँणले बताए । ‘राजधानी तोक्ने अधिकार प्रदेश सभाको हो, त्यसलाई परीक्षण गर्ने र सच्याउने काम पनि प्रदेशसभाकै हो’, उनले भने, ‘कुनै पूर्वाधार नभएको स्थानमा राजधानी लैजाँदा पूर्वाधार निर्माण, पानी, सिँचाइ, सडक, भवन बनाउँदा सरकारको खर्बौं रकम खर्च हुन्छ, यतिधेरै रकम खर्च गर्न सकिदैन ।’